最近都幫好多 family 影 family photo，想同大家分享下點樣同你 d 小朋友可以影 family photo 影得靚d，點樣可以捕捉到小朋友最開心嘅一面。

1. 讓小朋友對拍攝感到興趣

我都有兩個小朋友，知道一般小朋友都唔鐘意影相嘅，所以叫佢地出來影相，佢地就話：『又影相呀？』。所以要令到佢地有興趣，真係要話比佢地聽，係去玩嘅，唔係去影相嘅，有乜野最好嘅方法呢？

就係帶一d 佢地平時鐘意玩嘅野，同佢地一齊出去影相，例如可以帶：吹 bubble，有家長會帶足球，有家長就帶跳繩，或者 scooter ，單車之類，
呢D 都好受歡迎。等佢地一邊玩，就唔會諗住影緊相。

但要留意部份小朋友，就係太喜歡，例如踏單車。我都試過，有個小朋友好鐘意單車，要叫佢落車去影相，佢死都唔肯，好唔開心。所以最清楚小朋友就係家長自已，有乜野適合影相，同時有乜野係你可以同佢一齊玩嘅，唔係佢自已玩。

2. 準備與小朋友一起享受拍攝的時間

大家要明白，雖然大家都想影靚相，爸爸媽媽唔好不停諗住影緊相。我見有 d 爸爸媽媽，一影相，就會不停叫小朋友做好多野：『唔好掂呢d，唔好咁樣企呀』……比好多 指示比小朋友，或者不停叫小朋友望鏡頭。

我都好明白，大家都好想影到大家望住鏡頭嘅相，但如果爸爸媽媽，不停咁叫，其實 小朋都知道，你唔係同佢玩，而係逼佢地影相。通常佢地都第一可能唔鐘意，第二可能更加會作對，更加唔望鏡頭，第三就係就算你真係叫到小朋友望鏡頭，通常我發覺就輪到爸爸媽媽，個樣就配合唔到。因為不停咁叫小朋友，有可能個樣就好紋，所以影出來，效果都唔好。其實大家唔好浪費左時間，真係要信攝影師，交比攝影師，去影一d最好嘅 moment，同埋係合適嘅時間叫大家望鏡頭，唔需要每一刻都不停叫住望鏡頭。因為要相信我，你不停叫，反而影出來就唔係最靚。

3. 避免拍攝中途受到騷擾

一般小朋友嘅耐性好低，你唔好期望會影好耐，通常影一個鐘至個半鐘，包括 warm up 嘅時間，已經差唔多。另外你好難叫小朋友重複做同一件事，可能踢一陣足球，又要走去跑步，跟住又要玩其他野。所以當d小朋友好投入，肯去影相嘅時候，通常我都會盡快影好多嘅相。唔好花時間去，叫小朋友換衫，或者去做其他野，要把握好小朋友投入嘅時間，盡快去影

第二就係，去郊外地方，可能無洗手間。所以影之前，盡量帶小朋友去左洗手間，避免影相途中，又要去洗手間。當然爸爸媽媽都要關掉手機，唔好突然又要接聽電話。另外如果有比較細的小朋友，可能有習慣需要午睡，或者用餐後就好眼訓，你就要避免係呢段時間去影相，不用影相中途，突然好眼訓。

4. 可以預備一張大嘅檯布

我都會叫家長可以預備一張大的檯布去到郊外地方影相。香港好多草地都好乾淨，但係可能有時落完雨，又或者公園，早上都會澆水，草地都比較濕。
如果你坐上去，就會弄濕你的褲。帶塊布，墊住坐，就可以避免弄濕。

第二，如果你的小朋友比較細，因為高度問題，爸爸媽媽都要坐低跟小朋友影相。如果企係度影，就影出來不太靚。所以我都同爸爸媽媽，不要擔心坐在地上。我都試過有爸爸，可能條褲好靚，點都唔肯坐低。當然無坐低影咁靚。

另外你帶塊好靚嘅檯布，如果有小朋友唔鐘意玩，鐘意食野，你可以帶d零食。可以野餐，一路都可以影，所以塊檯布好有用。

5. 保護小朋友

最後就係，去郊外地方，最近都發覺唔多蚊。但係，好多公園，都有d 蚊滋，黑色一粒粒，叫做蠓。雖然就無咬我，可能我d皮比較厚，但就專咬小朋友同妹妹。所以記住幫小朋友噴，防蚊，防蠓嘅蚊怕水。

另外如果好好天，好猛太陽。戶外影相，最好找一些地方，有好多樹，有遮陰嘅地方。第一無咁曬，第二，有時太猛太陽，眼睛會感到好辛苦。係樹陰底下影就好好多，小朋友都唔會大熱。記得帶水，好熱嘅時候可以飲水。

呢五個小貼士，希望幫到大家。之後仲有好長時間不用上課，小朋友星期一至五都留係屋企，如果有機會疫情無咁嚴重，大家可以帶小朋友出去跑跑，放下電，都係一件好開心嘅事。